مکّہ 3 اکتوبر (ایس او نیوز): سعودی عرب کے مکّہ مُکّرمہ ریجن میں طائف – رانیہ روڈ پر پیش آئے ایک المناک سڑک حادثے میں دو ملیالی نرسوں، تمل ناڈو سے تعلق رکھنے والی دو نرسوں اور سعودی ڈرائیور سمیت پانچ افراد ہلاک ہوگئے۔ حادثہ جمعہ 2 اکتوبر کو پیش آیا، جب چاروں ہندوستانی نرسیں اپنی چھٹی کے دن رانیہ جانے کے بعد طائف واپس آرہی تھیں۔ رانیہ سے تقریباً 40 کلومیٹر دور ان کی کار مخالف سمت سے آنے والی جیپ سے ٹکرا گئی۔
ہلاک ہونے والی کیرالا کی نرسوں کی شناخت 46 سالہ جائسی مول میتھیو اور جوبینا جونی کے طور پر کی گئی ہے، دونوں کوٹایم کی رہنے والی تھیں، جبکہ دیگر دو نرسوں کی شناخت تمل ناڈو کے انا ستیا نگر سے تعلق رکھنے والی 37 سالہ وجئے لکشمی جگدیش اور تمل ناڈو کے تھنجاوور ضلع سے تعلق رکھنے والی 33 سالہ ہیپسِبا دیوامنی کے طور پر کی گئی ہے۔ ان کے ساتھ گاڑی چلانے والا سعودی شہری بھی حادثے میں ہلاک ہوگیا۔
رپورٹس کے مطابق چاروں نرسیں طائف گورنریٹ کے تحت ال غافہ اور العویلہ کے پرائمری ہیلتھ کلینکس میں خدمات انجام دے رہی تھیں۔ جمعہ ان کا چھٹی کا دن تھا اور وہ سعودی ڈرائیور کی گاڑی میں خریداری اور دیگر ضروریات کے لیے رانیہ گئی تھیں۔ واپسی کے دوران یہ حادثہ پیش آیا۔
سعودی اخبار المدینہ کے مطابق العویلہ – الحجرہ روڈ پر دو گاڑیوں کے درمیان تصادم ہوا، جس کے نتیجے میں نرسوں کی گاڑی میں سوار پانچوں افراد ہلاک ہوگئے۔ البتہ دوسری گاڑی، ایک جیپ شاص، کا ڈرائیور حادثے میں محفوظ رہا۔ المدینہ کے مطابق چاروں نرسیں اور سعودی ڈرائیور العویلہ ہیلتھ سینٹر سے وابستہ تھے، جو طائف ہیلتھ کلسٹر کے تحت آتا ہے۔ حادثے کے بعد پانچوں متوفین کی لاشیں رانیہ اسپتال منتقل کی گئیں۔
پتہ چلا ہے کہ حادثہ سعودی وقت کے مطابق جمعہ کی شام تقریباً 4:45 بجے پیش آیا۔ ملیالم میڈیا کی رپورٹ کے مطابق جوبینا جونی نے حادثے سے تقریباً دس منٹ قبل اپنے والدین سے فون پر بات کی تھی اور بتایا تھا کہ وہ خریداری مکمل کرنے کے بعد اپنے ہاسٹل واپس جانے کے لیے گاڑی میں سوار ہوئی ہیں۔ فون کال ختم ہونے کے کچھ ہی دیر بعد اہل خانہ کو حادثے کی اطلاع ملی۔
جوبینا جونی کے بارے میں بتایا گیا ہے کہ وہ اپنے خاندان کی مالی مدد کرتی تھیں۔ ان کے والد اسٹیشنری کا کاروبار کرتے ہیں جبکہ والدہ آشا ورکر ہیں۔ دوسری جانب جائسی مول میتھیو تقریباً 19 برس سے سعودی عرب میں کام کر رہی تھیں اور اپنی موجودہ ملازمت کی مدت مکمل کرنے کے بعد وطن واپس آنے کا ارادہ رکھتی تھیں۔ ان کے شوہر کوٹایم میں کاروبار کرتے ہیں اور ان کے تین بچے ہیں۔
چاروں نرسوں کی لاشیں فی الحال رانیہ جنرل اسپتال کے مردہ خانے میں رکھی گئی ہیں۔ مقامی حکام اور کمیونٹی تنظیمیں قانونی کارروائی مکمل کرنے اور لاشوں کو ہندوستان منتقل کرنے کے انتظامات میں مصروف ہیں۔