بنگلورو ، یکم جولائی (ایس او نیوز /ایجنسی ) کرناٹک کے چیف الیکٹورل آفیسر کے دفتر نے ووٹر فہرستوں کی خصوصی جامع نظرثانی (Special Intensive Revision - SIR) کے پہلے روز کی پیش رفت رپورٹ جاری کرتے ہوئے بتایا کہ ریاست بھر میں بوتھ لیول آفیسرز (BLOs) نے گھر گھر پہنچ کر ووٹروں میں شمار (Enumeration) فارم تقسیم کرنے کا عمل شروع کر دیا ہے۔
جاری کردہ پریس ریلیز کے مطابق 16 جون 2026 تک ریاست میں کل 5 کروڑ 54 لاکھ 32 ہزار 314 رجسٹرڈ ووٹر موجود ہیں، جبکہ ان تمام ووٹروں کے لیے شمار فارم پرنٹ کرکے بی ایل اوز کو فراہم کر دیے گئے ہیں۔
الیکشن کمیشن کے مطابق اب تک 91.61 فیصد ووٹروں کی میپنگ مکمل ہو چکی ہے۔ گھر گھر جا کر فارم تقسیم کرنے اور معلومات جمع کرنے کا عمل 30 جون سے 29 جولائی 2026 تک جاری رہے گا، جبکہ اسی مدت میں موصولہ فارموں کی ڈیجیٹلائزیشن بھی کی جائے گی۔
پہلے ہی دن ریاست بھر میں 12 لاکھ 48 ہزار 314 شمار فارم تقسیم کیے گئے، جو کل ووٹروں کا 2.25 فیصد بنتا ہے۔ اسی دوران 47 ہزار 817 فارم ڈیجیٹلائز کیے جا چکے ہیں، جبکہ 6 ہزار 840 ووٹروں نے اپنے فارم آن لائن جمع کرائے ہیں۔
پریس ریلیز کے مطابق ابتدائی جانچ کے دوران 291 ووٹر فوت شدہ پائے گئے۔ 116 ووٹر مستقل طور پر دوسرے مقام پر منتقل ہو چکے ہیں۔ 77 افراد پہلے ہی ووٹر فہرست میں درج پائے گئے۔ 488 معاملات مختلف جانچ کے لیے نشان زد کیے گئے۔ صرف 2 ووٹر گھر پر موجود نہیں ملے، جبکہ دیگر نوعیت کے 2 معاملات بھی درج کیے گئے۔
چیف الیکٹورل آفیسر کے دفتر کے مطابق بنگلورو سمیت تمام اضلاع میں فارم تقسیم اور ڈیجیٹلائزیشن کا عمل جاری ہے۔ بنگلورو اربن، بی بی ایم پی نارتھ، بی بی ایم پی ساؤتھ، بیلگاوی، میسور، کلبرگی، داونگیرے، رائچور، منڈیا، کولار، بیدر، وجئے پور، چکبالاپور، جنوبی کنڑ، شیموگہ اور دیگر اضلاع میں بی ایل اوز گھر گھر پہنچ کر ووٹروں سے معلومات حاصل کر رہے ہیں۔
الیکشن کمیشن نے تمام اہل ووٹروں سے اپیل کی ہے کہ وہ بی ایل اوز سے مکمل تعاون کریں، شمار فارم درست طور پر پُر کریں اور ضرورت کے مطابق مطلوبہ معلومات فراہم کریں تاکہ ووٹر فہرست کی نظرثانی کا عمل شفاف اور بروقت مکمل ہو سکے۔