لکھنؤ ، 22/ اگست (ایس او نیوز /ایجنسی)بنیادی سہولیات اور تدریسی عملے کی مبینہ کمی کے خلاف طلبہ کے سلسلہ وار احتجاج کے بعد اتر پردیش کے محکمہ تعلیم نے ریاست بھر کے تقریباً 40 ہزار بیسک اور سیکنڈری اسکولوں کے لیے 14 نکاتی چیک لسٹ جاری کی ہے۔ محکمہ نے افسران کو طلبہ کی جانب سے اٹھائے گئے مسائل کی تصدیق کرنے اور انہیں حل کرنے کی بھی ہدایت دی ہے۔ احتجاج کرنے والے اسکولی طلبہ سے بات چیت کے لیے نوجوان افسران کو تعینات کیا گیا ہے۔
چیک لسٹ میں پینے کا پانی، بیت الخلا، بجلی کی فراہمی، حفاظتی اقدامات اور ’پی ایم پوشن‘ منصوبہ کے تحت فراہم کیے جانے والے کھانے کے معیار کا معائنہ شامل ہے۔ لکھنؤ، اناؤ، ہمیرپور اور قنوج سمیت کئی اضلاع سے بنیادی سہولیات اور اساتذہ کی مبینہ کمی کے خلاف طلبہ کے احتجاج کی اطلاعات سامنے آئی تھیں۔ حکومت نے افسران کو سوشل میڈیا، ذرائع ابلاغ یا کسی بھی دوسرے پلیٹ فارم کے ذریعے موصول ہونے والی شکایات کی فوری تصدیق کرنے کی ہدایت دی ہے۔ شکایات کی صداقت اور حقائق کی صورت حال متعلقہ ضلع مجسٹریٹ کے سوشل میڈیا اکاؤنٹس کے ذریعے شیئر کی جائے گی۔ یہ ہدایات ڈویژنل اور ضلعی سطح کے محکمہ تعلیم کے افسران کو سختی سے عمل درآمد کے لیے بھیجی گئی ہیں۔
افسران سے کہا گیا ہے کہ وہ اچانک معائنہ کریں تاکہ یہ یقینی بنایا جا سکے کہ اسکولوں میں ضروری سہولیات موجود ہیں۔ معمولی مرمت اور دیکھ بھال کے لیے کمپوزٹ گرانٹس کا استعمال کرنے کی بھی ہدایت دی گئی ہے۔ محکمہ نے اسکولوں کو یونیفارم کی دستیابی، اساتذہ کی باقاعدہ حاضری اور تدریس و تعلیم کی سرگرمیوں کو بلا تعطل جاری رکھنے کو یقینی بنانے کی بھی ہدایت دی ہے۔ صفائی برقرار رکھنے اور مانسون کے دوران پانی جمع ہونے سے روکنے پر خصوصی زور دیا گیا ہے۔ محکمہ ترقیات کی ٹیمیں اسکولوں کے احاطے کا معائنہ کریں گی اور خامیوں کو مقامی سطح پر دور کیا جائے گا۔
افسران کو اسکولوں تک جانے والی سڑکوں پر موجود حفاظتی خطرات کی نشاندہی کرنے اور انہیں دور کرنے کی بھی ہدایت دی گئی ہے۔ محکمہ نے اسکولوں میں تعمیراتی کام کی باقاعدگی سے نگرانی کرنے کا حکم دیا ہے تاکہ معیار کو یقینی بنایا جا سکے۔ اس کے علاوہ اسکول مینجمنٹ کمیٹیوں (ایس ایم سی) سے کہا گیا ہے کہ وہ روزمرہ کے معیار کو برقرار رکھنے میں اپنا کردار ادا کرتی رہیں۔ ’کستوربا گاندھی بالیکا ودیالیوں‘ کے لیے الگ چیک لسٹ جاری کی گئی ہے۔ اس میں محفوظ ماحول، خواتین سیکورٹی گارڈز، حفظان صحت کے مطابق بیت الخلا، طبی سہولیات اور خواتین ڈاکٹروں کے دورے شامل ہیں۔
افسران کو یہ بھی یقینی بنانے کی ہدایت دی گئی ہے کہ طالبات کو ’پی ایم پوشن‘ منصوبہ کے تحت معیاری کھانا فراہم کیا جائے اور طلبہ کی حفاظت، رازداری اور وقار کا تحفظ کیا جائے۔ محکمہ نے اسکولوں کو والدین، اساتذہ، محکمہ تعلیم کے افسران، اسکول مینجمنٹ کمیٹی کے اراکین اور طلبہ کے ساتھ باقاعدہ رابطہ برقرار رکھنے کی ہدایت دی ہے۔ ’پیرنٹ ٹیچر ایسوسی ایشن‘ کے اجلاس باقاعدگی سے منعقد کیے جائیں گے اور والدین کو طلبہ کی تعلیمی کارکردگی، حاضری اور رویے کے بارے میں مطلع کیا جائے گا۔