بھٹکل، 12 اپریل (ایس او نیوز): خصوصی انتخابی فہرست کی جامع نظرثانی (SIR) کے بارے میں عوامی بیداری پیدا کرنے کے مقصد سے قومی سماجی ادارہ مجلسِ اصلاح و تنظیم کی جانب سے اتوار کو عوامی اجلاس اور تربیتی ورکشاپ کا انعقاد کیا گیا، جس میں بینگلور سے تشریف لائے ’میرا ووٹ میرا حق‘ ادارہ کے ذمہ داران نے واضح کیا کہ ایس آئی آر کے نام پر لاکھوں افراد کو حقِ رائے دہی سے محروم کرنے کی کوشش کی جا رہی ہے۔ اس صورتحال کے پیشِ نظر عوام کے لیے ضروری ہے کہ وہ بیدار ہوں اور ووٹر لسٹ میں میپنگ کے ذریعے اپنے ناموں کی شمولیت کو یقینی بنائیں۔
بھٹکل اور اطراف کے مختلف علاقوں سے آئے رضاکاروں اور شہر کے ذمہ داران کو میپنگ کے تعلق سے جانکاری فراہم کرتے ہوئے پی یو سی ایل کی آئشوریا اور ’میرا ووٹ میرا حق‘ ادارہ کے ونے سرینواس نے ایس آئی آر کے عمل کے مختلف مراحل پر تفصیلی روشنی ڈالی۔
انہوں نے ووٹرز کی میپنگ، گنتی، مسودہ ووٹر لسٹ کی اشاعت، دعوے و اعتراضات کی پیشی اور حتمی فہرست کی تیاری جیسے مراحل کی وضاحت کرتے ہوئے اس بات پر زور دیا کہ اپنے اپنے علاقوں میں عوام کی میپنگ کروا کر ایس آئی آر کے عمل کو بروقت مکمل کیا جائے۔ ساتھ ہی شفاف اور منصفانہ انتخابات کے لیے درست اور مکمل ووٹر لسٹ کی اہمیت پر بھی زور دیا۔
مقررین نے ایس آئی آر کے نفاذ کے دوران درپیش چیلنجز کا ذکر کرتے ہوئے واضح رہنما خطوط کی کمی، دستاویزی مسائل اور خواتین و مہاجر مزدوروں سمیت پسماندہ طبقات کو پیش آنے والی مشکلات کی نشاندہی کی۔ انہوں نے اس بات پر زور دیا کہ کوئی بھی اہل ووٹر فہرست سے خارج نہ ہونے پائے، اس کے لیے پیشگی اقدامات ضروری ہیں۔
پروگرام کی صدارت تنظیم کے صدر عنایت اللہ شابندری نے کی، جبکہ جنرل سیکریٹری عبدالرقیب ایم جے ندوی نے مہمانوں کا استقبال کیا۔ اس موقع پر اُڈپی ضلع مسلم اوکھوٹا کے یاسین ملپے سمیت دیگر ذمہ داران موجود تھے۔ پروگرام کے کنوینر مبشر ہلارے نے نظامت کرتے ہوئے آخر میں شکریہ ادا کیا۔
ایس آئی آر کے خلاف 15 اپریل کو احتجاج:
ورکشاپ کے بعد صحافیوں سے گفتگو کرتے ہوئے ’میرا ووٹ میرا حق‘ کے ذمہ دار ونے سرینواس نے کہا کہ ایس آئی آر کے نام پر لاکھوں ووٹرز کو فہرست سے خارج کر کے انہیں شہری نہ ہونے کے طور پر پیش کرنے کی کوشش کی جا رہی ہے۔ انہوں نے بتایا کہ اس کے خلاف 15 اپریل کو ریاست بھر میں احتجاج کیا جائے گا اور حکومت کو یادداشت (میمورنڈم) پیش کی جائے گی۔
انہوں نے مزید کہا کہ ایس آئی آر کے ذریعے بعض کمیونٹیز کو نشانہ بنایا جا رہا ہے۔ ساتھ ہی انہوں نے بتایا کہ ’میرا ووٹ میرا حق‘ کی جانب سے ریاست بھر میں بیداری اجلاس منعقد کر کے تمام طبقات کے اہل ووٹرز کے نام ووٹر فہرست میں شامل کرنے کے لیے حکمت عملی تیار کی گئی ہے۔ اس کے تحت رہنمائی مراکز قائم کیے جائیں گے اور بوتھ سطح پر رضاکاروں کو تعینات کیا جائے گا تاکہ کسی بھی ووٹر کا نام فہرست سے خارج نہ ہونے پائے۔