بھٹکل، 10 اکتوبر (ایس او نیوز) : پڑوسی ضلع اُڈپی کے بیندور میں پیش آئے سڑک حادثے میں بھٹکل کے ماہی گیر اُمیش منجوناتھ موگیر (43) کی موت ہوگئی، جبکہ ان کی اہلیہ پدما موگیر (35) شدید زخمی ہوگئیں۔ انہیں علاج کے لیے کنداپور اسپتال منتقل کیا گیا ہے۔
اطلاعات کے مطابق، بھٹکل کے بیلنی کے رہائشی اُمیش اپنی اہلیہ کے ساتھ موٹر سائیکل پر علاج کے لیے کنداپور گئے تھے۔ واپسی کے دوران نیشنل ہائی وے 66 پر اوتینانی گھاٹ کے مقام پر ان کی موٹر سائیکل ڈیوائیڈر سے ٹکرا گئی۔
اُمیش پیشے کے اعتبار سے ماہی گیر تھے۔ ان کے پسماندگان میں ایک بیٹا اور ایک بیٹی شامل ہیں۔
اُمیش کی لاش کو پوسٹ مارٹم کے لیے بیندور کے سرکاری اسپتال منتقل کیا گیا ہے۔ حادثے کے سلسلے میں بیندور پولیس اسٹیشن میں معاملہ درج کیا گیا ہے۔