بنگلورو ،22/ اگست (ایس او نیوز /ایجنسی)کرناٹک حکومت نے صارفین کے تحفظ اور صحت عامہ کو مدنظر رکھتے ہوئے ریاست بھر میں اینالاگ پنیر کی تیاری، ذخیرہ اندوزی، تقسیم، نقل و حمل اور فروخت پر ایک سال کے لیے پابندی عائد کردی ہے۔ یہ فیصلہ محکمہ خوراک تحفظ و ادویات انتظامیہ کی جانب سے جاری ہدایات کے تحت کیا گیا ہے۔

محکمہ صحت و خاندانی بہبود کے مطابق پابندی کے دوران کسی بھی غذائی کاروباری ادارے، ہوٹل یا ریسٹورنٹ کو اینالاگ پنیر ذخیرہ کرنے، فروخت کرنے، فراہم کرنے یا کھانے کی تیاری میں استعمال کرنے کی اجازت نہیں ہوگی۔

اینالاگ پنیر سے مراد ایسے نقلی یا متبادل پنیر کی مصنوعات ہیں جو روایتی دودھ سے تیار کیے جانے والے پنیر سے مشابہ ہوتی ہیں، لیکن ان میں دودھ کی چکنائی یا دودھ کے اجزا کو جزوی یا مکمل طور پر نباتاتی تیل، غیر دودھ کی چکنائی یا دیگر متبادل اجزا سے تبدیل کیا جاتا ہے۔

حکومت کا کہنا ہے کہ اس اقدام کا مقصد صارفین کو ایسی مصنوعات سے محفوظ رکھنا اور غذائی اشیا کے معیار کے ساتھ ساتھ عوامی صحت کے تحفظ کو یقینی بنانا ہے۔

ریاستی وزیر صحت و خاندانی بہبود یو ٹی قادر نے صارفین کے مفاد میں حکومت کے اس اقدام کو اہم قرار دیتے ہوئے کہا کہ غذائی اشیا کے معیار اور عوام کی صحت کے تحفظ کے لیے مقررہ ضوابط پر سختی سے عمل درآمد ضروری ہے۔

حکام نے غذائی کاروبار سے وابستہ افراد کو ہدایت دی ہے کہ پابندی کے دوران اینالاگ پنیر کی کسی بھی شکل میں خرید و فروخت، ذخیرہ یا استعمال سے گریز کریں۔