بنگلورو/داونگیرے/باگلکوٹ، 5/ مئی (ایس او نیوز /ایجنسی)کرناٹک کے دو اہم اسمبلی ضمنی انتخابات میں کانگریس نے شاندار کارکردگی کا مظاہرہ کرتے ہوئے داونگیرے اور باگلکوٹ دونوں حلقوں میں کامیابی حاصل کی ہے۔ ان نتائج کے بعد ریاست کی سیاسی صورتحال میں کانگریس کی پوزیشن مزید مضبوط ہوتی نظر آ رہی ہے، جبکہ اسے عوامی اعتماد میں اضافے کا واضح ثبوت بھی قرار دیا جا رہا ہے۔

داونگیرے جنوب اسمبلی حلقہ کے سخت مقابلہ والے ضمنی انتخاب میں کانگریس امیدوار سمرتھ شامنور نے کامیابی حاصل کر لی ہے۔ وہ 4,967 ووٹوں کے فرق سے آگے رہے۔ نتائج سامنے آتے ہی کانگریس کارکنان نے جشن منایا، ایک دوسرے کو رنگ لگا کر اور پارٹی قائدین کی تصاویر کے ساتھ خوشی کا اظہار کیا۔

اسی طرح باگلکوٹ اسمبلی حلقہ میں کانگریس امیدوار امیش میٹی نے پہلی ہی انتخابی مقابلے میں شاندار کامیابی حاصل کرتے ہوئے بی جے پی کے امیدوار ویرنّا چرنتی مٹھ کو 21,866 ووٹوں کے بڑے فرق سے شکست دی۔ امیش میٹی کو 97,941 ووٹ حاصل ہوئے جبکہ ان کے حریف کو 76,075 ووٹ ملے۔ اس طرح انہوں نے حلقہ میں جیت کے فرق کا نیا ریکارڈ قائم کیا، جو اس سے قبل 2018 کے انتخابات میں 15,934 ووٹوں کا تھا۔

یہ نشست سابق رکن اسمبلی ایچ۔وائی۔ میٹی کے انتقال کے باعث خالی ہوئی تھی، جس کے بعد کانگریس نے ان کے فرزند امیش میٹی کو امیدوار بنایا تھا۔ ان کی جیت پر خاندان اور حامیوں نے جذباتی ردعمل ظاہر کرتے ہوئے اسے مرحوم رہنما کے لیے خراجِ عقیدت قرار دیا۔

ان دونوں نشستوں پر کامیابی کو کانگریس کے لیے اہم سیاسی پیش رفت مانا جا رہا ہے، جبکہ پارٹی قیادت اور کارکنان نے اسے عوامی اعتماد کا مظہر قرار دیا ہے۔ سیاسی مبصرین کے مطابق یہ نتائج آنے والے انتخابات کے لیے بھی اہم اشارے دے سکتے ہیں۔