بنگلورو   ، 8/ اگست (ایس او نیوز /ایجنسی)ریاستی گارنٹی اسکیموں کے نفاذی ادارے کے نائب صدر دنیش گولی گوڑا نے کہا ہے کہ وزیر اعلیٰ ڈی۔ کے۔ شیوکمار نے گروہا لکشمی اسکیم کے تحت 2,443 کروڑ روپے جاری کر دیے ہیں، جو آئندہ 3 تا 4 دن کے اندر مستحق خواتین کے بینک کھاتوں میں ڈی بی ٹی (Direct Benefit Transfer) کے ذریعے منتقل کر دیے جائیں گے۔

وہ گریٹر بنگلورو اتھارٹی (GBA) کے تحت یلہنکا، بیاٹراین پورہ، ہیبّال اور سروگنا نگر اسمبلی حلقوں کی گارنٹی اسکیموں کی پیش رفت کا جائزہ لینے کے اجلاس سے خطاب کر رہے تھے۔

دنیش گولی گوڑا نے بتایا کہ گروہا لکشمی اسکیم کی 32ویں قسط جاری کی جا چکی ہے۔ اس کے ساتھ ہی ہر مستحق خاتون کو اب تک مجموعی طور پر 64,000 روپے فراہم کیے جا چکے ہیں، جبکہ اس سے قبل 62,000 روپے ان کے کھاتوں میں منتقل کیے جا چکے تھے۔

انہوں نے کہا کہ ریاستی حکومت نے گروہا لکشمی، گروہا جیوتی، انّا بھاگیہ، شکتی اور یووا ندھی سمیت پانچوں گارنٹی اسکیموں پر اب تک مجموعی طور پر 1 لاکھ 46 ہزار 443 کروڑ روپے خرچ کیے ہیں، جس سے ہر خاندان کو اوسطاً 5,000 سے 6,000 روپے ماہانہ کی بچت ہو رہی ہے۔

انہوں نے بتایا کہ گروہا لکشمی اور گروہا جیوتی اسکیموں میں اصلاحات کا مقصد صرف یہ یقینی بنانا ہے کہ فوائد حقیقی مستحقین تک پہنچیں اور کسی بھی قسم کے غلط استعمال کو روکا جا سکے۔

ان کے مطابق گروہ لکشمی اسکیم کے رجسٹرڈ مستحقین میں سے 1,95,224 افراد انتقال کر چکے ہیں، لیکن ان کے کھاتوں میں تقریباً 115 کروڑ روپے منتقل ہو چکے ہیں۔ اس صورتحال کو روکنے کے لیے حکومت جلد نئی ہدایات جاری کرے گی، جن کے تحت کسی مستحق کے انتقال کے 15 دن کے اندر اس کا نام فہرست سے حذف کر دیا جائے گا۔

انہوں نے کہا کہ گروہ جیوتی اسکیم کے تحت فراہم کی جانے والی مفت بجلی کے تجارتی استعمال کو روکنے کے لیے بھی ضروری اصلاحات کی جا رہی ہیں۔

دنیش گولی گوڑا نے مزید بتایا کہ ریاست میں 1.24 کروڑ راشن کارڈ رکھنے والے خاندانوں کو مفت چاول فراہم کیے جا رہے ہیں، جبکہ انّا بھاگیہ اسکیم کے تحت چاول کے متبادل کے طور پر اندرا کٹ تقسیم کرنے کی تیاری آخری مرحلے میں ہے۔

انہوں نے اعلان کیا کہ ریاست کی 22,000 سرکاری راشن دکانوں کو پورا دن کھلا رکھنے کے لیے حکومت جلد احکامات جاری کرے گی، جبکہ ہر راشن دکان میں ماہانہ اجلاس اور باقاعدہ شیڈول بھی نافذ کیا جائے گا۔

اجلاس میں جی بی اے گارنٹی اسکیم نفاذی کمیٹی کے صدر کرشنپا، بنگلورو شمالی ڈویژن کی صدر لاونیا نرسمہا مورتی، یلہنکا، ہیبّال، بیٹّراین پورہ اور سروگیہ نگر اسمبلی حلقوں کے صدور، نائب صدور اور کمیٹی کے ارکان شریک تھے۔

دنیش گولی گوڑا نے خبردار کیا کہ گارنٹی اسکیموں کی پیش رفت کا جائزہ لینے کے لیے ہر ماہ اجلاس منعقد کیا جائے گا اور غیر حاضر رہنے والے افسران یا کمیٹی ارکان کے خلاف کارروائی کی جائے گی۔ اس سلسلے میں وزیر اعلیٰ کو بھی رپورٹ پیش کی جائے گی۔

انہوں نے کہا کہ ہر علاقے میں مستحقین کے واٹس ایپ گروپ تشکیل دیے جائیں تاکہ عوامی شکایات، تجاویز اور اسکیموں سے متعلق معلومات بروقت پہنچ سکیں اور مسائل کا فوری حل ممکن ہو سکے۔

انہوں نے بتایا کہ گروہ جیوتی اسکیم کی نظرثانی کا کام بھی تیزی سے جاری ہے۔ سروگیہ نگر اسمبلی حلقہ میں یہ کام 90 فیصد مکمل ہو چکا ہے، جبکہ یلہنکا میں 47.68 فیصد، بیاٹرایناپور پورہ میں 55 فیصد اور ہیبّال میں 52 فیصد کام مکمل کیا جا چکا ہے۔