کاروار، 22/جون (ایس او نیوز ) اترکنڑا ضلع انتظامیہ نے 28 جون کو منعقد ہونے والی پلس پولیو مہم کے تحت پانچ سال سے کم عمر 89,388 بچوں کو پولیو کے قطرے پلانے کا ہدف مقرر کیا ہے۔
پیر کے روزکاروار میں منعقدہ ضلعی سطح کی جائزہ میٹنگ کی صدارت کرتے ہوئے ڈپٹی کمشنر کے. لکشمی پریا نے محکمۂ صحت کے حکام کو ہدایت دی کہ ضلع کا کوئی بھی اہل بچہ پولیو ویکسین سے محروم نہ رہنے پائے۔ اس مقصد کے لیے ضلع بھر کے شہری اور دیہی علاقوں میں 873 ویکسینیشن مراکز قائم کیے جائیں گے، جبکہ ٹرانزٹ پوائنٹس اور خصوصی مقامات پر بھی مہم چلائی جائے گی۔
ڈپٹی کمشنر نے عوامی بیداری مہم پر زور دیتے ہوئے کہا کہ تعمیراتی مزدوروں کے بچوں، مہاجر خاندانوں اور کچی آبادیوں میں رہنے والے پانچ سال سے کم عمر بچوں تک خصوصی طور پر رسائی حاصل کی جائے تاکہ سو فیصد کوریج یقینی بنائی جا سکے۔ انہوں نے 27 جون کو عوامی بیداری ریلی نکالنے کی بھی ہدایت دی۔
ویکسین کے محفوظ ذخیرے اور کولڈ چین برقرار رکھنے کے لیے ڈپٹی کمشنر نے ہیسکام حکام کو تمام پرائمری ہیلتھ سینٹروں اور کمیونٹی ہیلتھ سینٹروں میں بلا تعطل بجلی فراہم کرنے کی ہدایت دی۔ ضلع انتظامیہ نے مختلف سرکاری محکموں اور تنظیموں سے بھی مہم کی کامیابی کے لیے مکمل تعاون کی اپیل کی ہے۔
